މިއީ ޤާނޫނު ނަންބަރު 14/2011 މެދުވެރިކޮށް އިސްލާހުކޮށްފައިވާ ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 84 ވަނަ މާއްދާގެ ދަށުން ނެރެފައިވާ ރޫލިންގއެކެވެ. އެހެން ގޮތަކަށް ބަޔާންކޮށްފައިވާ ހާލަތެއްގައި މެނުވީ، ޤާނޫނަށް ޙަވާލާދީފައިވާ ތަންތަނުގައި ޙަވާލާދީފައި އެ ވަނީ ޤާނޫނު ނަންބަރު 5/2011 (ވިޔަފާރީގެ ފައިދާއިން ޓެކްސް ނެގުމުގެ ޤާނޫނު) އަށެވެ. އަދި ގަވާއިދަށް ޙަވާލާދީފައިވާ ތަންތަނުގައި ޙަވާލާދީފައި އެ ވަނީ އިސްލާހުކޮށްފައިވާ ގަވާއިދު ނަންބަރު 2011/R-35 (ވިޔަފާރީގެ ފައިދާއިން ޓެކްސް ނެގުމުގެ ގަވާއިދު) އަށެވެ. ޓެކްސް ދައްކާ ފަރާތްތަކުން މި ރޫލިންގއަށް ތަބާވުމަށް ޤާނޫނީ ގޮތުން ލާޒިމުކުރެއެވެ.

ތައާރަފު

1. މި ރޫލިންގގައި ތަފުސީލުކޮށްދީފައި ވަނީ ވިޔަފާރީގެ ފައިދާއިން ނެގޭ ޓެކްސްގެ ބޭނުމަށް، "ވަޒީފާގެ އެއްބަސްވުމެއްގެ ދަށުން އަދާކުރާ ވަޒީފާ" ގެ މާނައެވެ.

2. ޤާނޫނުގެ 6 ވަނަ މާއްދާގެ (ހ) ގައި ވަނީ:

ތިރީގައި ބަޔާންކުރެވޭ ގޮތަށް ދައްކާ ފައިސާއަކީ، އެއްވެސް ޓެކްސް އަހަރެއްގައި ދިވެހިރާއްޖޭގައި ދިރިއުޅެމުން ނުގެންދާ މީހަކަށް ދައްކާފައިވާ، ނުވަތަ އެ ޓެކްސް އަހަރުގައި ދައްކަންޖެހިފައިވާ ފައިސާއެއްނަމަ، އެ ފައިސާ ދައްކާ ފަރާތުން މި މާއްދާގެ ދަށުން ޓެކްސް ދައްކަންޖެހޭނެ ފައިސާއެވެ.

...

(4) ހިންގުމުގެ ގޮތުން، އަމިއްލަ ގޮތުން ނުވަތަ ޓެކްނިކަލް ގޮތުން ދޭ ޚިދުމަތަށް ދައްކާ ފައިސާ، އަދި ވަޒީފާއަކުން ލިބޭ އާމްދަނީއަކަށް ނުވާ އެނޫންވެސް ފީއެއް ނުވަތަ ކޮމިޝަނެއް؛

...

3. ޤާނޫނުގެ 43 ވަނަ މާއްދާގެ (ހ) ގައި ވަނީ:

މި ޤާނޫނުގައި ކަނޑައެޅިގެން އެހެން ގޮތަކަށް ބުނެފައިނުވާހާ ހިނދަކު:

...

"ވިޔަފާރި" ކަމަށް ބުނެފައި އެވަނީ، ވަޒީފާ އަދާކުރުން ނުހިމެނޭ ގޮތަށް ތިރީގައިވާ ކަންކަމަށެވެ.

(1) ހުރިހާ ބާވަތެއްގެ ފަންނީ އަދި އެނޫންވެސް މަސައްކަތާއި، އެންމެހައި ވިޔަފާރިއާއި، އުފެއްދުންތެރިކަމާއި، ދަނޑުވެރިކަމާއި، ދަނޑުގޮވާންކުރުމާއި، ހޯޓިކަލްޗަރއާއި، ލަކުޑި ގަސްހެއްދުމާއި، ފެނުގައި ގަސްގަހާގެހި ހެއްދުމާއި، ކުކުޅުހާ ފަދަ ދޫނީގެ ބާވަތްތައް ގެންގުޅުމާއި ނުވަތަ ގެރިބަކަރި ފަދަ ޖަނަވާރު ގެންގުޅުން، މަސްވެރިކަމާއި، މަސްމަހާމެހި ދިރުވައި ގެންގުޅުމާއި، އަދި އެ ނޫންވެސް މާލީ ފައިދާއެއް ނުވަތަ އިތުރުކުރުމެއް ހޯދުމުގެ ބޭނުމުގައި ހިންގާ އެންމެހައި ޙަރަކާތްތައް.

(2) ކޮންމެވެސް އަގެއް ހުރި މުޤާބިލަކަށް ނުއުފުލޭ މިލްކިއްޔާތެއް ބޭނުންކުރުމުގެ ޙައްޤު ދިނުން.

...

"ވަޒީފާ" ކަމަށް ބުނެފައި އެވަނީ، ވަޒީފާގެ އެއްބަސްވުމެއްގެ ދަށުން އަދާކުރާ ވަޒީފާއަށެވެ.

...

4. ޤާނޫނުގެ 49 ވަނަ މާއްދާގައި ވަނީ:

މި ޤާނޫނު ކަނޑައެޅިގެން އެހެން ގޮތަކަށް ބުނެފައިނުވާނަމަ، މި ޤާނޫނުގެ ދަށުން ހަދަންޖެހޭ އެންމެހައި ގަވާއިދުތައް ހަދައި، މި ޤާނޫނުގައިވާ ކަންކަން ހިންގާ ބަލަހައްޓާނީ އެމް.އައި.އާރ.އޭ އިންނެވެ.

ރޫލިންގ

5. ވަޒީފާގެ އެއްބަސްވުމެއްގެ ދަށުން އަދާކުރާ ވަޒީފާއެއްގެ ގޮތުގައި ބެލެވޭނީ ވަޒީފާދޭ ފަރާތާއި ވަޒީފާއަދާކުރާ ފަރާތާ ދެމެދުގައިވާ އިންތިޒާމުގައި ތިރީގައި ބަޔާންކޮށްފައިވާ އެންމެހައި ސިފަތައް ފުރިހަމަވާ ކަމުގައިވާނަމައެވެ.

(ހ) ވަޒީފާއަދާކުރާ ފަރާތުން އެ ވަޒީފާ އަދާކުރުމުގައި ޢަމަލުކުރާނެ ގޮތް ކަނޑައެޅުމުގެ ޙައްޤު ވަޒީފާދޭ ފަރާތަށް ލިބިގެންވުން.

(ށ) ވަޒީފާއަދާކުރާ ފަރާތަކީ ހަމައެކަނި އެ ވަޒީފާދޭ ފަރާތަށް މަސައްކަތްކޮށްދޭ ފަރާތަކަށްވުން؛

(ނ) ވަޒީފާއަދާކުރާ ފަރާތަށް އެ ފަރާތުގެ އަމިއްލަ އެހީތެރިން ޢައްޔަންކުރުމުގެ ބާރު ލިބިގެން ނުވުން؛

(ރ) ވަޒީފާއަދާކުރާ ފަރާތަށް އެ ވަޒީފާއާ ގުޅިގެން ކުރަންޖެހޭ މަސައްކަތްތައް "އައުޓްސޯސް" ކުރުމުގެ ބާރު ލިބިގެން ނުވުން؛

(ބ) ވަޒީފާދޭ ފަރާތުގެ ހުއްދަ ލިބިގެންމެނުވީ، ވަޒީފާއަދާކުރާ ފަރާތަށް އެ ވަޒީފާއާ ގުޅިގެން ކުރަންޖެހޭ މަސައްކަތްތައް، އެ ފަރާތުގެ ބަދަލުގައި ކުރުމަށް އެހެން ފަރާތަކާ ހަވާލުކުރުމުގެ ބާރު ލިބިގެން ނުވުން؛

(ޅ) ވަޒީފާއަދާކުރާ ފަރާތަކީ ޤާނޫނު ނަންބަރު 2008/2 (ވަޒީފާއާ ބެހޭ ޤާނޫނު) ގެ ދަށުން މުވައްޒަފުންނަށް ދެވޭ އެންމެހައި އިނާޔަތްތައް ލިބުން ޙައްޤު ފަރާތެއް ކަމުގައިވުން؛

(ކ) ވަޒީފާއަދާކުރާ ފަރާތަށް އެ ވަޒީފާއާ ގުޅިގެން ކުރަންޖެހޭ މަސައްކަތްތައް ކުރާނެގޮތާއި އެ މަސައްކަތްތައް ކުރުމުގައި ބޭނުންކުރާނެ ވަޞީލަތްތައް ކަނޑައެޅުމުގެ ބާރު ލިބިގެން ނުވުން.

6. މި ރޫލިންގގެ 5 ވަނަ ޕެރެގްރާފްގައި އެހެން ބަޔާންކޮށްފައި އޮތްނަމަވެސް، ވަޒީފާދޭ ފަރާތާއި ވަޒީފާއަދާކުރާ ފަރާތުގެ ދެމެދުގައިވާ އިންތިޒާމަކީ ޞައްޙަ އިންތިޒާމެއްކަމަށާއި އަދި އެފަދަ އިންތިޒާމަކީ އިސްތިސްނާކުރެވިދާނެ ފަދަ ހާލަތެއް ކަމުގައި މީރާއަށް ގަބޫލުކުރެވޭނަމަ އެ އިންތިޒާމަކީ، ޤާނޫނުގެ 43 ވަނަ މާއްދާގެ (ހ) ގައި ބަޔާންކޮށްފައިވާ ފަދަ ވަޒީފާގެ އެއްބަސްވުމެއްގެ ދަށުން އަދާކުރާ ވަޒީފާއެއް ކަމުގައި ކަނޑައެޅުމުގެ އިޚުތިޔާރު މީރާއަށް ލިބިގެންވެއެވެ.

7. މި ރޫލިންގގައި އެހެން ގޮތަކަށް ބަޔާންކޮށްފައި އޮތް ނަމަވެސް، ޤާނޫނުގެ 11 ވަނަ މާއްދާގެ (ނ) ގައި ބަޔާންކޮށްފައިވާ ފަރާތަކަށް ދައްކާ، ޤާނޫނުގެ 43 ވަނަ މާއްދާގައި މާނަކޮށްދީފައިވާ ފަދަ އުޖޫރަ ބެލެވޭނީ ވަޒީފާގެ އެއްބަސްވުމެއްގެ ދަށުން އަދާކުރާ ވަޒީފާއަކުން ލިބޭ އާމްދަނީގެ ގޮތުގައެވެ.

8. ޓެކްސް ރޫލިންގ TR-2019/B69 (ޓެކްސް ރޫލިންގ TR-2018/B65 އަށް ފުރަތަމަ އިޞްލާޙު ގެނައުން) އަށް ޢަމަލުކުރަން ފަށާ ތާރީޚުން ފެށިންގެން ޓެކްސް ރޫލިންގ TR-2012/B8 (ޑިރެކްޓަރުންނާއި، ޕާޓްނަރުންނާއި، ޓްރަސްޓީންނާއި، ޖަމާޢަތްތަކުގެ މެމްބަރުން ފޯރުވައިދޭ ޚިދުމަތްތައް) އުވުނީއެވެ.

9. މި ރޫލިންގއަށް ޢަމަލުކުރާނީ ޓެކްސް ރޫލިންގ TR-2017/A11 (ޓެކްސް ނެގުމާބެހޭ އިދާރީ ޤާނޫނުގެ ދަށުން ފަރުދުންނާއި "ޑީމްޑް ޕާޓްނަރޝިޕް" ރަޖިސްޓަރީކުރުން) އާ ޚިލާފުނުވާނެ ގޮތުގެ މަތިންނެވެ.

ޢަމަލުކުރަން ފެށުން

10. މި ރޫލިންގއަށް ޢަމަލުކުރަން ފަށާނީ މި ރޫލިންގ ދިވެހި ސަރުކާރުގެ ގެޒެޓްގައި ޝާއިޢުކުރާ ތާރީޚުން ފެށިގެންނެވެ. އަދި މި ރޫލިންގ ހިނގާނީ ޓެކްސް އަހަރު 2018 އާއި އޭގެ ފަހުން ފެށޭ ޓެކްސް އަހަރުތަކަށެވެ.